Rev 4 | BDD | STEP | Ginaulaedi bewa sigumwala pwaiya ma ya'e'ebubuna, 'oinega 'aigeda 'ahwa'eda ya'iteya galewega 'i'eso'eya. Ma wete 'aigeda 'enana gide yoguli, tauna tuwa mwalo yahesagoheya, 'oiguwa 'ilolohatoto 'igwaeya, “Cuhanema ma yahe'itago to'aha 'abwa 'ilatu.”

Revelation of John 4

Megalewa Yehoba 'oina si'e'etuluha.

1 Ginaulaedi bewa sigumwala pwaiya ma ya'e'ebubuna, 'oinega 'aigeda 'ahwa'eda ya'iteya galewega 'i'eso'eya. Ma wete 'aigeda 'enana gide yoguli, tauna tuwa mwalo yahesagoheya, 'oiguwa 'ilolohatoto 'igwaeya, “Cuhanema ma yahe'itago to'aha 'abwa 'ilatu.”

2 Nage 'oina Yaluyaluwa Tabuna 'ina waiwai yalotohoya, 'oinega galewa 'aigeda toloina ya'iteya 'ina wagahata* wasawasa 'oina 'imiyatoiya. 3 Ma manina ya'iteya 'inamala hedadeya. Ma wagahata wasawasaina hulele 'ala'alawana 'itoholo sakowasiyeya. 4 Ma wagahata wasawasa wete 'adi baibaiwa tuweniti powa simiya sakowasiyeya, ma wagahataedi 'oidiya taubadao site tuweniti powa simiyatoiya ma'adi 'ale'o wa'ewa'e'edi, ma wete debadi 'adi pasa wasawasa goula debadiya.

5 Ma wagahata wasawasaina gamwagamwanidiya 'oinega tupwana ginaula sihapwehapwesama, namala ma wete tupwana 'enana, ma wete gugula. Ma wete wagahata wasawasaina matana mayale sebeni sininininima, taudi beno Yehoba Yaluyaluwanao sebeni. 6 Ma wagahata wasawasaina matana 'aigeda ginaula 'inamanamala gide daumwala 'asilalana hola debana, 'ana 'ita gide tuwa gelasi. Ma wete 'ebemiya wasawasaina deina hebai 'ehata sitoholo sakowasiyeya, ma 'wapidi mabwaiyadi 'oidiya matadi simiyamiya.

7 Hebaiina 'aigeda 'ana 'ita gide tuwa laiyoni*, ma heluwena gide tuwa bulumakau, ma hetoina manina 'ana 'ita gide tuwa loheya, ma 'ehatana 'ana 'ita gide magisubu 'itahetaheya. 8 Ma 'aigeda 'aigeda pepediyao 'adi baibaiwa sikisi, ma pepediyaowedi mabwaiyadi matadi 'ebe 'ebubuna baibaiwadi 'atamanega ma 'alonega. Ma tuta mabwaiyana, sabwelo ma nihuwana 'oidiya, siwaliwali, sigwaegwae,

“Casilala, 'asilala, 'asilala,
Bada Yehoba Tohewaiwai.
Tauna tuta mwalo ta bewa
ta tuta 'inaonaoma 'oidiya 'imiyamiya.”
9 Tomiya hatayaina 'ina wagahata wasawasa 'oina 'imiyatoi, ma tuta baibaiwana hebaiyedi bewa siwaliwali hepwatu, ma si'ahwa'ahwa wasawasa, ma wete siloloyauwedo 'oina. 10 Ma tuta baibaiwana, 'eguma hebaiyedi bewa siwaliwali, babadao site tuweniti powaedi sibe'u talutalubu'i tauna miyamiya hatayana 'ina wagahata wasawasaina matana, ma si'etuluha 'oina. Ma debadi 'adi pasa goula wagahata wasawasaina matana silagu suluhediya, sigwaegwae,

11 “Cowa 'ima Bada ta 'ima Yehoba, 'ilobwainemaiya ma 'ahepwatuwego ma 'ahe'asisiyego, weyahina 'ino waiwaiyega ginaula mabwaiyana 'u'abi hemasalehediya. Cuboi 'ino nuwatuhuwega 'upaihowediya, ta nige mayawasidi.”